بأستسمحك
بلاش تغذي فيا
رغبة الانتقام
وتخلي عقلي
يعلن
على قلبي الخصام
واحد يقول
من حقي أرد
جرحي
الطاق طاقين
والتاني يصرخ فيه
بزيادة
حرام
وعشان كده
كلي رجا
بلاش تبادري بالاسية
وحاولي
وانتي بتبعدي
تحسسيني انك ضحية
خليني أنا العدواني
شرير الغرام
خلي التعاطف
يحمي شعلة الاحترام
وعشان كده باستحلفك
سيبيني اكتب الشعر
اللي ينفع يوصفك
ما تحوليش
الجرح جوايا للغم
ومافيش جوايا غيرك انتي
فينسفك
عشان كده باستسمحك
ما تخلنيش
أخاف أقرب
م القلم
لا يجرحك
وما تهدميش
عقيدتي
ان الشعر
مخلوق
يمدحك
باستسمحك
