دين أبونا دين سماحة | وليد الأسيوطي

دين أبونا فـ التعامل ،
كله عامل بالأصول ،
والوصول للجنة غاية ،
أعلى من كل المسائل ،
واللي سائل ، واللي لسه يوم هايسأل ...
عن طبيعة دين أبونا ،
راح أقوله بشكل واضح ،
اللي يقتل واللي يسحل ، واللي بيكفّر في أهله ،
واللي يكدب ، واللي يعمل فعل فاضح ،
كله ده ، مش فعل دين ،

يامغيبين

دينا مش دين الآلام ،
دين أبونا دين سماحة ،
دين سلام ،
دين ابونا عمره ماكان دين انتقام !
.،
دين ابوهم بالكلام ،
دين ابوهم شكل منظر والسلام !
وإهتمام ، بالمظاهر ،
نسيوا معنى الاحترام ،
نسيوا مبدأ المعاملة
نسيوا جوهر الكلام ،
فسروا معنى الجهاد ،
باللي يخدم المصالح ،
واللي صالح حتى منهم ...
غيبوا عقله بكلامهم ،
وبآثامهم ، شوهوا كل الجمال ،
اللي جوا دين خالقنا ،
.،
دين ابونا ، ودين ابوهم برضه واحد ،
بس نفسي حد منهم يوم يقولي ..
دين ابونا ليه خدوه ، .. غيروه ،
ولا ليه الفهم غاب
عن مقاصد الشريعة ،
نفسي حد منهم يوم يقولي ،
ازاي وليه ، وفي اي عقل ،
دين ابونا ، يشوهوه !!
.،
دين ابوهم بس كرسي ،
ولا منصب ،
ولا جاه
واتجاه العقل فيهم ، للشمال ،
خنقوا معنى الفن فينا ،
والتقدم ، والحضارة
كتفوا بايدهم ايدينا
رجعونا 1000 عام
فهمونا إن دين أبوهم بالكلام ،
دين ابوهم ...
شكل منظر والسلام !

دين أبونا دين سماحة ،
دين سلام ،
دين ابونا عمره ماكان دين انتقام !

.،

وليد الاسيوطي ،
2013